سەمەيدەگى ءاليحان بوكەيحانوۆتىڭ ەسكەرتكىشى مادەني مۇرا تىزىمىنە ەنگىزىلدى
وسى جىلدىڭ ناۋرىز ايىندا سەمەيدىڭ تاريحي-مادەني وبەكتىلەرىن ساقتاۋدىڭ 2021-2025-جىلدارعا ارنالعان جول كارتاسى بەكىتىلگەن. سوعان سايكەس، 9 تاريحي جانە مادەني ەسكەرتكىشتى جوندەۋ، قالپىنا كەلتىرۋ جوسپارلانىپ وتىر.
بۇل تۋرالى باسپا ءسوز كونفەرەنتسياسى بارىسىندا قالالىق مادەنيەت جانە تىلدەردى دامىتۋ ءبولىمىنىڭ باسشىسى نازەركە اققوجينا مالىمدەدى.
«ت. كاۋكەنوۆ مەشىتى، مەتيز-فۋرنيتۋرا زاۋىتىنىڭ عيماراتى، ناسوس ستانتسياسى، ءورت ءسوندىرۋ دەپوسى، سپورت مەكتەبى، گۋبەرناتور ءۇيى (قازىرگى وبلىستىق تاريحي-ولكەتانۋ مۇراجايى)، پوشتاشى ليپۋحين ءۇيى (ف. دوستويەۆسكي ادەبي-مەموريالدىق ءۇي-مۇراجايى)، نيەۆزوروۆتار وتباسى مۋزەيى جانە ءبىر مۇنارالى مەشىتكە قالپىنا كەلتىرۋ جۇمىستارىن جۇرگىزۋ كوزدەلگەن.
سونىمەن قاتار ش ق و اكىمدىگىنىڭ قاۋلىسىمەن ماڭگىلىك ەل مەن شۋگايەۆ كوشەلەرىنىڭ قيىلىسىنداعى جەڭىس ساياباعىندا ورنالاسقان ءاليحان بوكەيحانوۆتىڭ ەسكەرتكىشى مادەني مۇرا ەسكەرتكىشتەر تىزىمىنە ەنگىزىلدى»، - دەدى ول.
قالانىڭ تاعى ءبىر ماڭىزدى نىسانى - ۇرانحايەۆ كوشەسى، 17 مەكەنجايىندا ورنالاسقان 1873-جىلى سالىنعان بۇرىنعى ايەلدەر گيمنازياسىنىڭ عيماراتى. بۇگىنگى تاڭدا عيماراتتىڭ مەنشىك يەسى - «Semey mall» ج ش س. وسى جىلدىڭ 25- اقپانىندا وندا تاريحي-مادەني ساراپتاما جۇرگىزۋ باستاماسى كوتەرىلگەن.
«تاريحي-مادەني مۇرانى قورعاۋ جونىندەگى وبلىستىق كوميسسياسىنىڭ شەشىمىمەن اتالعان عيماراتقا جەرگىلىكتى ماڭىزى بار تاريح جانە مادەنيەت ەسكەرتكىشى مارتەبەسىن بەرۋ ماقۇلداندى. كوميسسيا شەشىمى ق ر مادەنيەت جانە سپورت مينيسترلىگى جانىنداعى ارنايى كوميسسياعا كەلىسۋگە جىبەرىلدى»، - دەدى ءبولىم باسشىسى.