الماتى اۋەجايىندا كولىك ۇشاقتىڭ استىنا كىرىپ كەتتى - ۆيدەو

وقيعا ورنىنان تۇسىرىلگەن ۆيدەو الەۋمەتتىك جەلىدە پايدا بولدى. وندا ۇشاق پەن كولىك بۇگىن تاڭعى ساعات جەتىدە سوعىلعانى ايتىلعان. كولىكتىك پوليتسيا دەپارتامەنتى ءمان-جايدى انىقتاپ جاتىر.

«اتالعان فاكتى بويىنشا ق ر قىلمىستىق كودەكسىنىڭ 344-بابىنىڭ 1-ءبولىمى بويىنشا سوتقا دەيىنگى تەرگەۋ باستالدى. قازىرگى ۋاقىتتا ءىس بويىنشا قاجەتتى تەرگەۋ ارەكەتتەرى جۇرگىزىلۋدە. قازاقستان رەسپۋبليكاسى قىلمىستىق ءىس جۇرگىزۋ كودەكسىنىڭ 201 - بابىنىڭ تالاپتارىنا سايكەس تەرگەۋ مۇددەسى ءۇشىن باسقا اقپارات جاريا ەتىلمەيدى»، - دەپ حابارلادى ۆەدومستۆادان.

ايتا كەتەيىك، وسى جىلدىڭ مامىرىندا الماتى اۋەجايىندا ەكى ۇشاق سوقتىعىسقان. تىركەپ سۇيرەۋ كەزىندە ا 320 ۇشاعى Boeing 767 ۇشاعىن جاناپ ءوتتى. ەكى اۋە كەمەسى دە Air Astana اۋە كومپانياسىنا تيەسىلى.