اۋىلدا ايۋ ءجۇر

كەشە دە كاتونقاراعاي اۋىلىندا تۇرعىندار قوڭىردىڭ قونجىعىن كورگەن. وتكەندە عانا تايىنشاداي ايۋ ەمىن- ەركىن اۋىل ىرگەسىندە جايىلىپ جۇرگەنىن ەستىگەنبىز.

- تاڭ سىز بەرە، ءۇيدىڭ قارسى بەتىندەگى توعايعا قاراسام، قايىڭنىڭ باس جاعىنان الدەبىر نوقات قاراۋىتادى. قۇس دەيىن دەسەم، ءىرى. جاقىنداپ بارىپ قارادىم، كادىمگى ايۋدىڭ قونجىعى. تەگى يتتەن قاشتى ما، قايىڭنىڭ باس جاعىنا شىعىپ الىپتى، - دەيدى اۋىل تۇرعىنى سەيداحمەت ءاشىمحانوۆ.

ۇلتتىق پارك قىزمەتكەرلەرىنىڭ ايتۋىنشا، ايۋ اۋىلدىڭ اياق جاعىندا وسەتىن جابايى الماعا كەلەتىن كورىنەدى. ونىڭ ۇستىنە ميگراتسيا ۋاقىتى. سوڭعى ساناق بويىنشا، كاتونقاراعاي تابيعي ۇلتتىق پاركىنىڭ اۋماعىنداعى ايۋلاردىڭ سانى 330 عا جەتكەن. ەلدى مەكەندەرگە ەركىن كەلگىشتەپ جۇرگەندەرىمەن مالعا، ادامعا زيانى جوق.

- كوكتەم مەن كۇزدە ساناق جۇرگىزىپ وتىرامىز. جالپى، اڭ سانى كوبەيىپ كەلەدى. اتۋعا مۇلدەم بولمايدى. زاڭ بار، سوعان قاراي ءتارتىپ بار. اۋىل تاۋدىڭ ەتەگىندە تۇرعاندىقتان اڭداردىڭ اۋىلعا ءتۇسۋى قالىپتى جاعداي. ەڭ باستىسى، ادامزاتقا زيانى تيمەسە بولدى، - دەيدى كاتونقاراعاي م ۇ ت پ جانۋارلاردى قورعاۋ جانە ءوڭدىرۋ ءبولىمىنىڭ باستىعى ەرىك قاسىموۆ.

انەبىر جىلدارى كاتون اۋىلىنىڭ ورتالىق كوشەسىندە ءمۇيىزى شاڭىراقتاي بۇلان دا كوزگە تۇسكەن. ال ايۋدىڭ اۋىلعا كىرۋى ءبىرىنشى رەت ەمەس. الايدا قايىڭنىڭ بيىگىنە شىعىپ الىپ، تۇسە الماي تۇرعانىن كوپشىلىك قىزىقتاپ، سۋرەتكە ءتۇسىرىپ الىپتى. ايتپاقشى، جەرگە تۇسكەن قونجىقتى قورىقشىلار ۇركىتىپ تاۋ جاققا قاراي قۋىپ جىبەرگەن.

مەرەي قاينار ۇلى

egemen.kz