ەلىمىزدەگى بىرلىك پەن تاتۋلىققا قارسى ايتىلعان بىردە- ءبىر ءسوز جاۋاپسىز قالماۋى كەرەك - توقايەۆ
بۇل تۋرالى قازاقستان حالقى اسسامبلەياسىنىڭ كەڭەيتىلگەن وتىرىسىندا مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«التىنشى ماسەلە - اسسامبلەيانىڭ اقپاراتتىق جۇمىسىن ءتيىمدى جۇرگىزۋ. بۇل رەتتە ءاربىر اۋديتوريا ءۇشىن بولەك ۇستانىم بولۋى كەرەك. قازىر ەلەكتروندى ب ا ق پەن الەۋمەتتىك جەلى اقپارات تاراتۋدىڭ ماڭىزدى قۇرالىنا اينالدى. ءوڭىر باسشىلارى جەرگىلىكتى اسسامبلەيانىڭ جەتەكشىسى رەتىندە اقپاراتتىق كەڭىستىكتە بەلسەندى بولۋى قاجەت»، - دەدى مەملەكەت باسشىسى.
ق ر پرەزيدەنتى اسسامبلەيا مۇشەلەرى مەديا سالادا، سونىڭ ىشىندە الەۋمەتتىك جەلىدە ءوز ۇستانىمىن قورعاي ءبىلۋى تيىستىگىن باسا ايتتى.
«ەلىمىزدەگى بىرلىك پەن تاتۋلىققا قارسى ايتىلعان بىردە- ءبىر ءسوز جاۋاپسىز قالماۋى كەرەك. اسسامبلەيا قىزمەتىنە بايلانىستى اقپاراتتىق جۇمىس ناقتى كەلىسىلىپ، ءاربىر قادام ءبىرىڭعاي الگوريتم بويىنشا اتقارىلۋى قاجەت. مەملەكەتتىك اقپاراتتىق تاپسىرىس بارىنشا ءتيىمدى ورىندالۋعا ءتيىس»، - دەدى قاسىم- جومارت توقايەۆ.
اۆتور: مارلان جيەمباي