ايجان ەسماعامبەتوۆا الماتى وبلىسىنداعى ۆاكسينا تيەلگەن كولىك اپاتى تۋرالى پىكىر ءبىلدىردى

None
None
نۇر-سۇلتان. قازاقپارات - ۆاكسينا تاسىمالداۋ مەن ساقتاۋ بويىنشا ناۋقاننىڭ تيىمدىلىگىنە كەرى اسەر ەتەتىندەي بۇزۋشىلىقتار تىركەلگەن جوق.

سانيتارلىق-ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا ورتالىق كوممۋنيكاتسيالار قىزمەتىندە ءوتىپ جاتقان بريفينگىدە وسىلاي ايتتى، دەپ حابارلايدى قازاقپارات ءتىلشىسى.

«بىزدە ەكپە بەكەتتەرىن اشپاس بۇرىن تەكسەرۋ جاساۋ تاجىريبەسى بار. ياعني، ۆاكسيناتسيا باستالعانعا دەيىن جاسالادى. ال ۆاكسيناتسيا پروتسەسىن مونيتورينگ ارقىلى قاداعالايمىز. اقپان ايىندا 200 دەن استام ەكپە بەكەتىمەن جۇمىس باستاعان بولساق، قازىر ەلىمىز بويىنشا 2000 داي پۋنكت بار. بەكەتتە ۆاكسيناتسيا جۇمىستارى باستالعانعا دەيىن ونداعى تەمپەراتۋرالىق رەجيمنىڭ ساقتالۋىنا تەكسەرۋ جۇرگىزىلەدى. ۆاكسيناتسيا جاپپاي باستالعانعا دەيىن ءاربىر ءۇشىنشى پۋنكتە ءتۇرلى سيپاتتاعى بۇزۋشىلىقتار بولدى. تەك ساقتاۋ نەمەسە تاسىمالداۋمەن عانا قاتىستى ەمەس، جالپى ۇيىمداستىرۋ ماسەلەسىمەن بايلانىستى دا اقاۋلار انىقتالدى. اتالعان اقاۋى بار ەكپە بەكەتتەرى كەمشىلىكتەر تولىق جويىلعاننان كەيىن عانا ۆاكتسيناتسيا ناۋقانىنا قوسىلىپ وتىرعانىن ايتقىم كەلەدى»، - دەدى كوميتەت باسشىسى.

ونىڭ مالىمەتىنشە، كەيبىر وڭىرلەردە ەلەكتر قۋاتى وشىرىلگەن جاعدايدا ەكپەنى قاجەتتى تەمپەرۋرادا ۇستاۋدىڭ قوسىمشا جوسپارى بولماي شىققان.

«ەلەكتر قۋاتى اجىراتىلعان جاعدايدا ۆاكسينانى ساقتاۋدىڭ قوسىمشا جوسپارى بولۋى كەرەك. كەيبىر وڭىرلەردە وسىنداي جوسپار بولماعان. ءبىراق جوسپاردىڭ بولماۋى ۆاكسينالاۋدىڭ تيىمدىلىگىنە كەرى اسەر ەتتى دەگەن ءسوز ەمەس. تەمپەراتۋرا رەجيمى بۇزىلدى دەيتىندەي ءبىر وقيعادان باسقا فاكتى تىركەلگەن جوق. الماتى وبلىسىندا جول-كولىك وقيعاسى بولىپ، ۆاكسينا تاسىمالدايتىن رەفرەجاتور زاقىمدانعان بولاتىن. وقيعا ورنىندا تەرگەۋ ءجۇرىپ، زاقىمدانعان ۆاكسينالاردىڭ سانى انىقتالعان. ول ۆاكسينالاردىڭ كوزى جويىلدى. ياعني، اينالىمنان الىندى، ەكپە الۋشىلارعا جەتكەن جوق»، - دەگەن ايجان ەسماعامبەتوۆا ۆاكسيناتسيا پروتسەسىندە ەكپەنى ساقتاۋ مەن تاسىمالداۋدىڭ ۆاكسينالاۋ تيىمدىلىگىنە كەرى اسەر ەتەتىندەي بۇزۋشىلىقتار بولعان جوق دەگەندى بىرنەشە رەت قايتالادى.

ەسكە سالساق، ەلدەگى سانيتارلىق-ەپيدەميولوگيالىق احۋال جونىندەگى جۇمىس كەڭەسىندە پرەزيدەنت قاسىم-جومارت توقايەۆ كەي وڭىرلەردە ۆاكسينا ساقتاۋدىڭ تەمپەراتۋرالىق رەجيمى بۇزىلعانىن ايتقان بولاتىن.

سوڭعى جاڭالىقتار