وليمپيادا ويىندارىنا شولۋ: قازاقستان تۋىن قانداي سپورتشىلار الىپ شىقتى

سالتاناتتى شەرۋدە الەمنىڭ 200 ەلىنەن كەلگەن 11 مىڭعا تارتا سپورتشى ءجۇرىپ وتەدى جانە قۇراما اراسىندا ءبىر سپورتشىنى ەلدىڭ تۋىمەن شىعارۋ ءداستۇرى بار.

بۇل دا سپورتشىعا ارتىلعان جاۋاپكەرشىلىكتى ەسەلەي تۇسەتىندەي كورىنەدى. ءار جىلدارى قازاقستان تۋىن ءتۇرلى باعىتتاعى سپورتشىلار كوتەرىپ شىقتى. قازاقپارات اگەنتتىگى قازاقستان تۋىن كوتەرىپ شىققان ۇلانداردىڭ وليمپيادا ناتيجەلەرىنە شولۋ ۇسىنادى.

قازاقستاننىڭ تاۋەلسىز ەل رەتىندە قاتىسقان العاشقى جازعى وليمپياداسى 1996 -جىلى ا ق ش- تىڭ اتلانتا قالاسىنا وتكەن ەدى. وندا جامبىلدىق جاس بوكسشى ەرماحان يبرايموۆ تۋ الىپ شىقتى. بۇل وليمپيادادا سپورتشى «قولا» جۇلدە الدى. جالپى ەسەپتە قازاقستان 11 مەدالمەن 197 ەل اراسىندا 24-ورىنعا تۇراقتادى. 4 جىلدان كەيىن اۋستراليانىڭ سيدنەي قالاسىندا وتكەن كەزەكتى وليمپيادادا دا ەرماحان يبرايموۆ تۋ ۇستاۋشى بولدى.

ازىرگە ە. يبرايموۆ - قازاقستاندا ەكى وليمپيادادا تۋ الىپ شىققان جانە ەكەۋىندە دە جۇلدەمەن ورالعان جالعىز سپورتشى. سيدنەي ويىندارىندا بوكسشى قازاقستان قانجىعاسىنا «التىن» اكەلدى. سيدنەيدىڭ تاعى ءبىر چەمپيونى بەكزات ساتتارحانوۆ ەكەۋى بوكس جۇلدىزدارىنا اينالدى. قازاقستان وليمپيادا ناتيجەسى بويىنشا 199 مەملەكەت اراسىنان 22-ورىنعا كوتەرىلدى.

2004 -جىلعى ءداستۇرلى دودا وليمپيادا وتانى - گرەكيادا ءوتتى. سالتاناتتى اشىلۋدا قازاقستان تۋىن دزيۋدوشى ايبىندى اسحات جىتكەيەۆ الىپ شىقتى. ودان حالىقتىڭ ەرماحان يبرايموۆتىڭ جولىن، جەڭىسىن كۇتكەنى راس. بۇل دودادا ا. جىتكەيەۆ 7-ورىن الىپ، جۇلدەگە ىلىگە المادى. جالپى قازاقستاننىڭ ناتيجەسى تومەن بولىپ، 201 ەلدىڭ اراسىندا 40-ورىنعا ءبىر- اق سىرعىدى.

دەگەنمەن، 2008 -جىلى بەيجىڭ وليمپياداسىندا 27 جاستاعى اسحات جىتكەيەۆ «كۇمىس» جۇلدەگە قول جەتكىزدى. بۇل - قازاقستاننىڭ دزيۋدو باعىتىنداعى العاشقى وليمپيادا مەدالى بولدى. 2008 -جىلعى بەيجىڭ وليمپياداسىندا قازاقستان تۋىن الىپ شىعۋ مارتەبەسى اۋىر اتلەتيكادان ازيا چەمپيونى باقىت احمەتوۆكە بەرىلدى. باقىت احمەتوۆ سيدنەي وليمپياداسىندا 15- ورىن، افينا وليمپياداسىندا - 7-ورىن العان ەدى. بەيجىڭ ويىندارىندا 415 كەلى ناتيجەمەن 5-ورىن الدى. قازىر باقىت احمەتوۆ - اۋىر اتلەتيكادان قازاقستان قۇراماسىنىڭ باس باپكەرى. ونىڭ سالتاناتتى شەرۋدەگى ۇلتتىق كيىمىن تانىمال ديزاينەر، ستيليست قۇرالاي نۇرقادىلوۆا تىككەن ەدى. قازىر بۇل كوستيۋم وليمپيادا ەستەلىگى رەتىندە بەيجىڭدەگى مۋزەيدە تۇر.

2012 -جىلى لوندوندا وتكەن وليمپيادا ويىندارىندا ەلىمىزدىڭ كوك بايراعىن گرەك- ريم كۇرەسىنىڭ بالۋانى، ازيانىڭ ەكى دۇركىن چەمپيونى نۇرماحان تىناليەۆ ۇستاپ شىقتى. الايدا جارىس جولىن 1/8 فينالدان باستاعان ن. تىنالييەۆ شۆەتسيالىق ەۋرەن يوحاننان جەڭىلىپ قالدى. 2016 -جىلى ريو وليمپياداسىندا لوندوندا كەتكەن ەسەنى قايتارعىسى كەلدى. دەگەنمەن، بۇل جولى ساتتىلىك سەرىك بولمادى، ن. تىنالييەۆ العاشقى بەلدەسۋىنە نەمىس سپورتشىسى ەدۋارد پوپتاننان جەڭىلىپ قالدى. كەيىنىرەك ول 2018 -جىلى يندونەزيادا وتكەن ازيا ويىندارىندا جاراقاتپەن كۇرەسىپ، ەكىنشى ورىن الدى. 2019 -جىلدىڭ قاراشاسىندا ماسكەۋ گران- پريىندە، جەلتوقساندا الماتىدا سپورتتىق جەكپە- جەك جانە كۇش قولدانىلاتىن سپورت تۇرلەرىنەن كونفەدەراتسيا كۋبوگىنا قاتىستى. ال 2020 -جىلى ن. تىنالييەۆ فرانتسيادا گرەك- ريم كۇرەسىنەن وتكەن گران- پري باسەكەسىندە «كۇمىس» جۇلدە الدى.

ريو- دە- جانەيرو قالاسىندا وتكەن جازعى وليمپيادادا 20 جاستاعى تاەكۆوندوشى رۋسلان جاپاروۆ تۋ ۇستاۋشى بولدى. الايدا سپورتشى العاشقى اينالىمدا ازەربايجاندىق قارسىلاسى راديك يسايەۆتان 11:2 ەسەبىمەن جەڭىلدى. جۇبانىش كەزدەسۋىندەگى جەكپە- جەكتە تە وتانداسىمىز 29 جاستاعى وڭتۇستىك كورەيالىق چحا دون ميننەن جەڭىلىپ قالدى. رۋسلان جاپاروۆ بيىل دا توكيو وليمپياداسىنا قاتىسۋعا جولداما الدى. ول تاەكۆوندودا 80 كەلىدەن جوعارى سالماق دارەجەسىندە ەل نامىسىن قورعايدى. 27 -شىلدە كۇنى العاشقى قارسىلاسى گەرمانيالىق الەكساندر باحمانمەن بوز كىلەمگە شىعادى.

بيىل توكيو وليمپياداسى قارساڭىندا پرەزيدەنت قاسىم- جومارت توقايەۆ قازاقستان رەسپۋبليكاسىنىڭ مەملەكەتتىك تۋىن العاش رەت ەكى بىردەي تۋ ۇستاۋشىعا - جەڭىل اتلەتيكادان وليمپيادا چەمپيونى ولگا رىپاكوۆا مەن بوكستان الەم چەمپيوناتىنىڭ كۇمىس جۇلدەگەرى قامشىبەك قوڭقابايەۆقا تابىستادى. سپورتشىلار تۋدىڭ توكيو تورىندە ءجيى كوتەرىلىپ، ءانۇراننىڭ شىرقالۋى ءۇشىن بارىن سالۋعا ۋادە بەردى.

ولگا رىپاكوۆا - وسكەمەن قالاسىنىڭ تۋماسى، بۇعان دەيىن ءۇش وليمپياداعا قاتىسىپ، ۇشەۋىنەن دە جۇلدەمەن ورالعان تاجىريبەلى سپورتشى. ول ءۇش قارعىپ سەكىرۋ بويىنشا 2008 -جىلى بەيجىڭ قالاسىندا «كۇمىس» مەدال العان، 2012 -جىلى لوندوندا - «التىن» جانە 2016 -جىلى ريو- دە- جانەيرودا - «قولا» مەدال العان. ودان بولەك، ولگانىڭ ەنشىسىندە ۋنيۆەرسيادا «التىنى» جانە ازيا ويىندارىنىڭ 6 التىن مەدالى بار. سونداي- اق، ول الەم چەمپيونى جانە 2010 -جىلعى قۇرلىقتىق كۋبوگتىڭ يەگەرى.

قامشىبەك قوڭقابايەۆ - وليمپيادا شارشى الاڭىندا زور جاۋاپكەرشىلىككە يە بولعان بوكس قۇراماسىنىڭ كاپيتانى. ول 2014 -جىلى اسكەريلەر اراسىندا وتكەن الەم چەمپيوناتىنىڭ جەڭىمپازى. ازيا چەمپيوناتىنىڭ ەكى دۇركىن جەڭىمپازى جانە 2017 مەن 2019 -جىلعى الەم چەمپيوناتتارىنىڭ كۇمىس جۇلدەگەرى. توكيو وليمپياداسى 29 جاستاعى قىزىلوردالىق سپورتشى ءۇشىن العاشقى وليمپيادا ويىندارى بولماق.

ايتا كەتەيىك، وليمپيادا ويىندارىنىڭ اشىلۋ سالتاناتى 23- ماۋسىمدا توكيو وليمپيادا ستاديونىندا وتەدى. قازاقستان قۇراماسىندا سپورتتىڭ 28 تۇرىنەن وليمپيادانىڭ 97 جولداماسى بار. بۇعان دەيىن قازاقپارات اگەنتتىگى 1996 -جىلدان بەرى قازاقستان قۇرامالارىنىڭ وليمپيادا اشىلۋىنا كيگەن سالتاناتتى فورمالارىنا شولۋ جاساعان ەدى.

اۆتور: ايجان سەرىكجان قىزى