تارازدا «اناعا تاعزىم» ورتالىعى سالىنىپ جاتىر - فوتو

ق. رىسقۇلبەكوۆ اتىنداعى ساياباقتىڭ جانىندا بيزنەستىڭ الەۋمەتتىك جاۋاپكەرشىلىگى اياسىندا «اناعا تاعزىم» ورتالىعى بوي كوتەرىپ جاتىر. ءۇش قاباتتى عيماراتتىڭ قۇرىلىسىن «ەلىم - ستروي» ج ش س جۇرگىزۋدە.

مەردىگەر كومپانيا نىساندى وسى جىلدىڭ كۇزىندە تاپسىرۋدى جوسپارلاپ وتىر. مۇندا نازىك جاندىلارعا ارنالىپ ءتۇرلى كۋرستار ۇيىمداستىرىلىپ، ولارعا قۇقىقتىق جانە پسيحولوگيالىق كومەكتەر كورسەتىلەدى. سونداي-اق، بالالار مەن جاسوسپىرىمدەر ءۇشىن ترەنينگتەر، قولونەر بولمەلەرى جۇمىس ىستەيتىن بولادى. عيماراتتىڭ الدىندا انالاردىڭ قۇرمەتىنە ارنالىپ ەسكەرتكىش ورناتىلماق. ساۋلەت جانە قالا قۇرىلىسى باسقارماسىنىڭ باسشىسى ارمان ابدەشوۆ ەسكەرتكىش جەرگىلىكتى مۇسىنشىلەردىڭ قولىنان شىققانىن اتاپ ءوتتى.

وبلىس اكىمى نىساننىڭ ىشكى بەزەندىرۋ جۇمىستارىن ۇلتتىق ناقىشتا جۇرگىزۋدى تاپسىردى. تاراز قالاسىنىڭ مەكتەپتەن تىس جۇمىس جانە بالالار شىعارماشىلىعى ورتالىعىنىڭ ورنىندا جاقىندا وقۋشىلار سارايى اشىلماق. قازىر 600 ورىندىق تاعى ءبىر كورپۋستىڭ قۇرىلىسى ءجۇرىپ جاتىر.

ونىڭ قۇرىلىسىمەن «تاراز قۇرىلىس ينۆەست» ج ش س اينالىسۋدا. جاڭا عيماراتتىڭ جالپى اۋدانى - 9,3 مىڭ شارشى مەتر. ال، ورتالىقتىڭ ەسكى عيماراتىنىڭ ءوزى جوندەۋدەن وتەدى. جۇمىس ىستەپ تۇرعان ۇيىرمەلەردەن بولەك، كەمە مودەلدەۋ، ۇشاق مودەلدەۋ، روبوتوتەحنيكا، IT ورتالىعى، پلانەتاري، وبسەرۆاتوريا ۇيىرمەلەرى اشىلادى.

بەردىبەك ساپاربايەۆ قۇرىلىس جۇمىستارىنىڭ باياۋ جۇرگىزىلىپ جاتقانىنا نازار اۋدارىپ، قۇرىلىس باسقارماسىنا باقىلاۋدى تاپسىردى. بۇدان سوڭ №2 جانە №22-ورتا مەكتەپتەردەگى قۇرىلىس جۇمىستارىمەن تانىستى. ءوڭىر باسشىسى مەكتەپتەردىڭ جاڭا وقۋ جىلىنا دەيىن تاپسىرىلۋى ءتيىس ەكەنىن اتاپ ءوتتى. سول سەكىلدى شالعاي قاراسۋ ماسسيۆىندە 600 وقۋشىعا ارنالعان جاڭا مەكتەپ سالىنۋدا. وبلىس اكىمى مەكتەپ اۋماعىن اباتتاندىرۋعا ەرەكشە نازار اۋدارۋدى جانە دالىزدەردى موتيۆاتسيالىق جانە تانىمدىق سۋرەتتەرمەن بەزەندىرۋدى تالاپ ەتتى.

اۆتور: سايا سەمباي