سەنات سپيكەرى ءابدىجامىل نۇرپەيىسوۆتى 97 جاسقا تولعان تۋعان كۇنىمەن قۇتتىقتادى

«بۇگىن حالىق جازۋشىسى، قازاق ادەبيەتىنىڭ كلاسسيگى، قازاقستاننىڭ ەڭبەك ەرى ءابدىجامىل نۇرپەيىسوۆتىڭ تۋعان كۇنى. سانالى عۇمىرىن جازۋ- سىزۋعا ارناعان اعامىز 97 جاسقا تولىپ وتىر. قالامگەردىڭ عۇمىر جولىنا قاراپ وتىرىپ، ۇلت تاريحىنىڭ وتكەن عاسىرداعى تۇتاس تاراۋلارىن كورۋگە بولادى. ابەكەڭ بالا كۇنىندە تاركىلەۋ، اشارشىلىق سياقتى زوبالاڭداردى باسىنان وتكەردى. ون سەگىزگە تولار- تولماس شاعىندا سوعىسقا اتتاندى. وسىنىڭ ءبارى كەيىن جازۋشىنىڭ شىعارماشىلىعىنا ارقاۋ بولدى. شىن مانىندە، سۋرەتكەردىڭ قالامىنان تۋعان دۇنيەلەر - قازاق ادەبيەتىنىڭ التىن قورىنا قوسىلعان قىمبات قازىنا. ونىڭ ىشىندە «قان مەن تەر» جانە «سوڭعى پارىز» روماندارىنىڭ شوقتىعى بيىك. بۇل شىعارمالار قاشاندا ءار بۋىننىڭ ءسۇيىپ وقيتىن تۋىندىلارى بولىپ قالا بەرەدى»، - دەپ جازدى ماۋلەن اشىمبايەۆ Facebook پاراقشاسىندا.

سەنات سپيكەرىنىڭ اتاپ وتۋىنشە، حالىق جازۋشىسى شىعارمالارىنىڭ باسىم بولىگىن كەڭەستىك كەزەڭدە جازدى. دەگەنمەن، تاۋەلسىزدىك العان تۇستا دا ۇلتتىق ادەبيەتتىڭ ءورىسىن كەڭەيتۋگە زور ەڭبەك ءسىڭىردى. قازاق پەن- كلۋبىن قۇرىپ، ونىڭ جانىنان «تاڭ- شولپان» اتتى ادەبي جۋرنال اشتى. بۇل ەگەمەندىكتىڭ ەلەڭ- الاڭ شاعىندا جاڭا زامانعا بەيىمدەلە قويماعان قالامگەرلەر ءۇشىن ۇلكەن قولداۋ بولدى.

«وسىلايشا ابەكەڭ ادەبيەتكە دەگەن ادالدىقتىڭ وزىق ۇلگىسىن كورسەتتى. جالپى، ءابدىجامىل اعا تۋرالى ايتقاندا، ونىڭ تاباندىلىق، ىرىلىك، ورلىك قاسيەتتەرىنە توقتالماي كەتۋ مۇمكىن ەمەس. راسىمەن، اعامىز بۇرالاڭى كوپ ءومىر جولىندا ەشقاشان ءوز بيىگىنەن تومەندەگەن ەمەس. قاشاندا اسقاق، اقسۇيەك، كەربەز قالپىن ساقتاي ءبىلدى. ارداقتى ابە! تۋعان كۇنىڭىزبەن قۇتتىقتاي وتىرىپ، سىزگە زور دەنساۋلىق جانە اماندىق تىلەيمىن! ەلدىڭ ىقىلاسىنا بولەنىپ، ورتامىزدا امان- ەسەن جۇرە بەرىڭىز»، - دەدى سەنات ءتوراعاسى.

اۆتور: مارلان جيەمباي