قۇربان ايتتىڭ العاشقى كۇنى 40 مىڭ وتباسىعا ەت تاراتىلدى - ق م د ب

None
None
نۇر- سۇلتان. قازاقپارات - ايت مەرەكەسىنىڭ ءبىرىنشى كۇنى قازاقستاندا 40 مىڭنان استام وتباسىعا ەت تاراتىلدى، دەپ حابارلايدى قازاقپارات قازاقستان مۇسىلماندارى ءدىني باسقارماسىنا سىلتەمە جاساپ.

«قازاقستان مۇسىلماندارى ءدىني باسقارماسىنىڭ قوعام الدىنداعى نەگىزگى 4 قىزمەتىنىڭ ءبىرى - قايىرىمدىلىق شارالارىن ۇيىمداستىرۋ. ق م د ب كومەككە مۇقتاج جانداردى قولداۋ، قاۋىپتى ىندەتتىڭ الدىن الۋ ماقساتىندا بيىل تاعى دا قاشىقتان قۇربان شالۋدى قولعا الىپ، WWW. QURBAN2021.KZ سايتىن ىسكە قوسقان بولاتىن. جوبا ماقساتى - قايىرىمدىلىققا دانەكەر بولۋ، حالىقتىڭ دەنساۋلىعى مەن ومىرىنە تونگەن قاۋىپتى سەيىلتۋگە ۇلەس قوسۋ، قۇربان شالۋعا نيەت بىلدىرگەن جاندارعا كارانتين جاعدايىندا وڭتايلى جول ۇسىنۋ»، - دەلىنگەن ق م د ب حابارلاماسىندا.

قۇربان ايتتىڭ العاشقى كۇنىندەگى مالىمەت بويىنشا رەسپۋبليكا دەڭگەيىندە qurban2021.kz سايتى ارقىلى 2132 ادام قۇرباندىق شالۋعا تاپسىرىس بەرسە، ەلىمىز بويىنشا جالپى سانى 7670 مال شالىنعان.

«ونىڭ ىشىندە 6740 قوي، 603 ءىرى قارا، 318 ەشكى، 9 تۇيە بار. بارلىق مالىمەتتى جيناقتاپ ايتقاندا، ەلىمىز بويىنشا 40156 وتباسىعا قۇرباندىق ەتى تاراتىلدى. حالقىمىزدا «قايىرىمدىلىق جاساساڭ، قايىرىن ءوزىڭ كورەسىڭ» دەگەن ناقىل ءسوز بار. بارشاڭىز شىنايى نيەتپەن قۇربان شالىپ، مۇقتاج وتباسىلارعا مەرەكەلىك قۋانىش سىيلاپ، ساۋاپتى ىسكە ورتاقتاسىپ وتىرسىزدار. كومەك العان جانداردىڭ سىزدەرگە جولداعان دۇعا- تىلەكتەرى قابىل بولعاي. جاراتقان جاببار يەمىز مەرەيلەرىڭىزدى ۇستەم ەتىپ، ەكى دۇنيەنىڭ نىعمەتى مەن قۇرمەتىنە بولەنۋدى ءناسىپ ەتكەي. ءامين!»، - دەپ حابارلادى ءدىني باسقارما.

ايتا كەتەيىك، 2021 -جىلى قۇربان شالۋ ءراسىمى ەكى جولمەن جۇزەگە اسىرىلادى. ءبىرىنشى جولى: مەملەكەتتىك سانيتارلىق- ەپيدەميولوگيالىق قاداعالاۋ ورگاندارى تاراپىنان رۇقسات بەرىلگەن جەرگىلىكتى قاساپحانالاردا سانيتاريا ەرەجەلەرىن قاتاڭ ساقتاي وتىرىپ «سارى» جانە «جاسىل» ايماقتاردا ونلاين جانە وفلاين فورماتتا وتكىزۋ. ەكىنشى جولى: ەلىمىزدىڭ «قىزىل» ايماقتارىندا قۇربان شالۋ ءراسىمى qurban2021.kz سايتى ارقىلى تەك ونلاين رەجيمدە وتكىزۋ.

اۆتور: ايجان سەرىكجان قىزى


سوڭعى جاڭالىقتار