توكيو-2020: بۇگىنگى ناتيجە كوڭىلدەن شىقتى - دەنيس گانكين

ەرلەر اراسىنداعى سىندا قازاقستان كومانداسى ونەر كورسەتىپ، دەنيس گانكين العاشقى وندىققا ەندى، دەپ حابارلايدى قازاقپارات Olympic.kz-كە سىلتەمە جاساپ.

دەنيس گانكين 669 ۇپاي جيناپ، 64 سپورتشىنىڭ ىشىنەن 9- ورىن يەلەندى. يلفات ابدۋللين 27-شى، سانجار مۇسايەۆ 52- ساتىدا. ىرىكتەۋ كەزەڭىنىڭ قورىتىندىسى بويىنشا وڭتۇستىك كورەيا وكىلى كيم دجە دوك كوش باستادى. ەكىنشى ورىندا امەريكالىق برەدي ەليسون، ءۇشىنشى ساتىدا كورەيالىق ون دجين حەك ورنالاسقان.

«بۇگىنگى ناتيجەم كوڭىلىمنەن شىعادى. تەك جارىس سوڭىنا قاراي جەلدىڭ كۇشەيگەنى ازداعان كەدەرگى كەلتىردى. ايتپەسە، قالعانىنىڭ ءبارى ويداعىداي. باپكەرلەرىم تەحنيكالىق تۇرعىدان قاتەلەسپەۋدى تاپسىرعان بولاتىن. ەلدەگى تىنىمسىز دايىندىقتىڭ كومەگى كوپ بولدى. جالپى العاندا، ءبىزدىڭ كوماندا ءۇشىن بۇگىنگى كورسەتكىش جامان ەمەس. سانجار مەن يلفات تا جاقسى ونەر كورسەتتى. ولارعا دا جەل كەدەرگى كەلتىرسە كەرەك. ويتكەنى، جەلدىڭ باعىتى تۇسىنىكسىز. ەندى 26 شىلدە كۇنى كوماندالىق جارىستى باستاپ، مەدالعا تالاسامىز»، - دەدى دەنيس Olympic.kz تىلشىسىنە بەرگەن سۇحباتىندا.

ايتا كەتەلىك، ىرىكتەۋ كەزەڭىنىڭ قورىتىندىسى بويىنشا كەلەسى اينالىمداعى سپاررينگتىك جۇپتار انىقتالادى. قازاقستاندىق يلفات ابدۋللين ۇلىبريتانيا وكىلى دجەيمس ۆۋدگەيتكە قارسى شىعادى. دەنيس گانكين ەگيپەت نامىسىن قورعايتىن يۋسۋف تولبامەن ءوزارا مىقتىنى انىقتايدى. سانجار مۇسايەۆ قىتايلىق داپەنگ ۆانگپەن 1/16 فينال جولداماسىنا تالاسادى. كوماندالىق سىندا قازاقستان ءۇندىستان قۇراماسىمەن كەزدەسەدى.