ءبىلىم گرانتىنا قاتىسۋ ءۇشىن 100 مىڭعا جۋىق ءوتىنىش ءتۇستى

None
None
نۇر- سۇلتان. قازاقپارات - ەلىمىزدە ءبىلىم بەرۋ گرانتتارىن تاعايىنداۋ كونكۋرسىنا قاتىسۋ ءۇشىن قۇجاتتاردى قابىلداۋ جالعاسىپ جاتىر. بۇل تۋرالى ب ع م سىلتەمە جاساپ قازاقپارات حابارلايدى.

بۇگىنگى تاڭدا 100 مىڭعا جۋىق ءوتىنىش بەرىلدى. قۇجاتتاردى قابىلداۋ 16- شىلدەدە باستالىپ، 25 - شىلدەگە دەيىن جالعاساتىنىن ەستەرىڭىزگە سالا كەتەيىك.

قۇجاتتاردى راسىمدەۋ Egov ەلەكتروندىق ۇكىمەت پورتالى ارقىلى ونلاين جۇزەگە اسىرىلادى. جوعارى وقۋ ورىندارىندا ۆيرتۋالدى قابىلداۋ كوميسسيالارى جۇمىس ىستەيدى. ولار تالاپكەرلەرگە بەينە بايلانىس ارقىلى كەڭەس بەرەدى.

مەملەكەتتىك ءبىلىم بەرۋ گرانتتارىن تاعايىنداۋ كونكۋرسىنا قاتىسۋعا قۇجاتتاردى ەلەكتروندى تۇردە تاپسىرۋ ءۇشىن تالاپكەرلەرگە كەلەسى قۇجاتتار قاجەت:

1. جەكە كۋالىك؛ 2. 3-4 كولەمىندەگى ەلەكتروندىق سيفرلىق فوتو؛

3. ورتا ءبىلىم تۋرالى اتتەستاتتىڭ كوشىرمەسى؛

4. تەحنيكالىق جانە كاسىپتىك ءبىلىم بەرۋ (ت ج ك ب) ۇيىمدارىنىڭ تۇلەكتەرى ءۇشىن ديپلومنىڭ كوشىرمەسى؛

5. ت ج ك ب ۇيىمدارىنىڭ تۇلەكتەرى ءۇشىن جۇمىس ءوتىلىن راستايتىن قۇجاتتار؛

6. جەڭىلدەتىلگەن سانات بويىنشا كونكۋرسقا قاتىسۋ ءۇشىن راستايتىن قۇجاتتار، اتاپ ايتقاندا:

- 1، II توپتاعى مۇگەدەكتەر، بالا كەزىنەن مۇگەدەكتەر، مۇگەدەك بالالار قاتارىنداعى ازاماتتار؛

- جەڭىلدىكتەر مەن كەپىلدىكتەر بويىنشا ۇلى وتان سوعىسى قاتىسۋشىلارىنا تەڭەستىرىلگەن ادامدار؛

- اۋىلداردىڭ الەۋمەتتىك- ەكونوميكالىق دامۋىن ايقىندايتىن ماماندىقتار بويىنشا اۋىل جاستارى اراسىنان شىققان ازاماتتار؛

- قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامدار؛

- جەتىم بالالار جانە اتا- اناسىنىڭ قامقورلىعىنسىز قالعان بالالار، سونداي- اق كامەلەتكە تولعانعا دەيىن اتا- اناسىنان ايىرىلعان نەمەسە اتا- اناسىنىڭ قامقورلىعىنسىز قالعان جاستار قاتارىنداعى ازاماتتار؛

- «ماڭگىلىك ەل جاستارى - يندۋسترياعا!» جوباسىنا قاتىسىپ جاتقان اۋىل جاستارى («سەرپىن» )؛

- 4 جانە ودان دا كوپ كامەلەتكە تولماعان بالالاردى تاربيەلەپ وتىرعان وتباسىلاردان شىققان بالالار؛

- مارتەبەسى كەمىندە ءۇش جىل تولىق ەمەس وتباسىلار قاتارىنداعى بالالار؛

- بالا كەزىنەن مۇگەدەك بالالاردى، ءبىرىنشى جانە ەكىنشى توپتاعى مۇگەدەكتەردى تاربيەلەپ وتىرعان وتباسىلاردان شىققان بالالار.

ەگەر تالاپكەر «التىن بەلگى» يەگەرى بولسا نەمەسە وتانسۇيگىشتىك جانە بەلسەندى ازاماتتىق ۇستانىمى ءۇشىن ەرەكشەلىك بەلگىسىمەن ماراپاتتالسا، وندا ول باسقا تالاپكەرلەرمەن بالدارى تەڭ بولعان جاعدايدا باسىم قۇقىققا يە بولادى. وليمپيادالار مەن سپورتتىق جارىستاردىڭ جەڭىمپازدارى دا باسىم قۇقىققا يە. ءوتىنىش بەرۋشىنىڭ مۇنداي جەتىستىكتەرى ەسكەرىلۋى ءۇشىن راستايتىن قۇجاتتاردىڭ كوشىرمەلەرىن دە جۇكتەۋ قاجەت.

شەت ءتىلىن مەڭگەرگەنىن راستايتىن حالىقارالىق سەرتيفيكات بولعان كەزدە ءوتىنىش بەرۋشى حالىقارالىق ءتىل سەرتيفيكاتىنىڭ اتاۋىن، بالىن كورسەتەدى جانە ەلەكتروندىق سەرتيفيكاتتى تىركەيدى.

ەستەرىڭىزگە سالا كەتەيىك، كونكۋرسقا قاتىسۋ ءۇشىن قۇجاتتاردى تاپسىرۋ كەزىندە مەديتسينالىق انىقتاما تالاپ ەتىلمەيدى. مەديتسينالىق انىقتامانى تامىز ايىندا ۋنيۆەرسيتەتكە قابىلداۋ كەزىندە تاپسىرۋ قاجەت. ءوتىنىش بەرۋ بويىنشا نۇسقاۋلىقپەن تومەندەگى سىلتەمە ارقىلى ءوتىپ، تانىسا الاسىز.


سوڭعى جاڭالىقتار